Tadbirkorlik faoliyatini amalga oshirish tartibini belgilaydigan Nizom tasdiqlandi
O'zbekiston Respublikasi Prezidentining «Xususiy mulk, kichik biznes va xususiy tadbirkorlikni ishonchli himoya qilishni ta'minlash, ularni jadal rivojlantirish yo'lidagi to'siqlarni bartaraf etish chora-tadbirlari to'g'risida»gi Farmoniga muvofiq, Vazirlar Mahkamasi qarori bilan “Xususiy tadbirkorlar tomonidan xodimlarni yollagan holda tadbirkorlik faoliyatini amalga oshirish tartibi to'g'risida”gi Nizom tasdiqlandi. Ushbu hujjat tadbirkorlik faoliyatini amalga oshirish tartibini belgilaydi.
Hujjatda Davlat soliq qo'mitasi xususiy tadbirkorlar tomonidan yollangan xodimlar cheklangan sonining belgilangan mezonlariga rioya etishi yuzasidan nazorat o'rnatishi, shuningdek yollanadigan xodimlarni belgilangan tartibda rasmiylashtirmasdan faoliyatni amalga oshirayotgan xususiy tadbirkorlarni aniqlashga doir chora-tadbirlarni kuchaytirishi nazarda tutilgan.
Nizom qoidalari yuridik shaxs bo'lmagan oilaviy tadbirkorlik subektlariga tatbiq etilmaydi. Unda xodimlarni yollamasdan faoliyatni amalga oshiradigan xususiy tadbirkorlar uchun qonunchilikda nazarda tutilgan davlat ro'yxatidan o'tkazish, hisobga qo'yish va ruxsat beruvchi hujjatlarni rasmiylashtirishning belgilangan tartibi amal qilinishi ko'rsatib o'tilgan. Shuningdek hujjatda, xususiy tadbirkor xodimlar yollashni bankda belgilangan tartibda hisob raqami ochilgandan keyin amalga oshirishi mumkinligi ham keltirib o'tilgan. Unga ko'ra, bir necha faoliyat turlari bilan shug'ullanadigan xususiy tadbirkor, faoliyat turlari sonidan qat'i nazar, uch nafardan ko'p bo'lmagan xodimlarni yollash huquqiga ega. Xususiy tadbirkor bilan mehnat munosabatlari o'rnatgan jismoniy shaxslarga xususiy tadbirkor sifatida qaralmaydi va ular xususiy tadbirkor nomidan huquqiy hujjatlarni imzolash huquqiga ega emas.
Shu bilan birga, Nizomda mehnat shartnomasini tuzish va yollangan xodimlarning mehnat stajini hisoblash xususiyatlari ham ko'rsatib o'tilgan. Xususan, tadbirkor bilan xodim o'rtasidagi mehnat munosabatlari ushbu Nizomda nazarda tutilgan xususiy tadbirkorlik faoliyatini amalga oshirish xususiyatlarini hisobga olgan holda mehnat qonunchiligi bilan tartibga solinadi. Xususiy tadbirkor xodimlarning mehnat huquqlariga rioya etilishini ta'minlashi shartligi ham qayd etilgan. Xodimlarni yollaydigan xususiy tadbirkorlarni davlat soliq hizmati organlarida hisobga olish xususiyatlariga ko'ra esa, tadbirkor yollangan xodimni hisobga qo'yish to'g'risida xodim bilan mehnat shartnomasi tuzilgan sanadan boshlab uch ish kunidan kechikmay davlat soliq xizmati organiga ariza taqdim etadi.
UzReport
