Pensiya jamg'armasiga o'tkazilgan sug'urta badallarini yakka tartibda hisobga olish reyestrini shakllantirish
Davalatimiz rahbarining 2013 yil 25 dekabrdagi «O'zbekiston Respublikasining 2014 yilgi asosiy makroiqtisodiy ko'rsatkichlari prognozi va Davlat byudjeti parametrlari to'g'risida»gi qaroriga va Vazirlar Mahkamasining tegishli qaroriga muvofiq Davlat soliq qo'mitasi va Moliya vazirligi “Fuqarolarning O'zbekiston Respublikasi Moliya vazirligi huzuridagi byudjetdan tashqari Pensiya jamg'armasiga o'tkazilgan sug'urta badallarini yakka tartibda hisobga olishning markazlashtirilgan elektron reyestrini shakllantirish va yuritish to'g'risidagi nizomni tasdiqlash haqida” qaror qabul qildi.
Sug'urta badallarini hisobga olish reyestrini shakllantirish va yuritishning asosiy maqsadi Davlat soliq qo'mitasining ma'lumotlar yagona axborot bazasi negizida fuqarolarning Moliya vazirligi huzuridagi byudjetdan tashqari Pensiya jamg'armasiga sug'urta badallarining yakka tartibda hisobga olish bo'yicha ma'lumotlarning yagona elektron axborot bazasini yaratish hisoblanadi.
Xujjatda belgilanishicha, sug'urta badallarini hisobga olish reyestri fuqarolarning Pensiya jamg'armasiga hisoblangan sug'urta badallari to'g'risidagi ma'lumotlar asosida shakllanadi.
Sug'urta badallarini hisobga olish reyestrida hisobga olinishi lozim bo'lgan ma'lumotlar elektron shaklda ish beruvchi tomonidan Yagona ijtimoiy to'lov va fuqarolarning byudjetdan tashqari Pensiya jamg'armasiga sug'urta badallari hisob-kitobiga rasmiylashtiriladi.
Qarorda qayd etilishicha, Davlat pensiyalarini tayinlash va to'lash ishlarini o'z vaqtida tashkil etish maqsadida DSQ tomonidan Pensiya jamg'armasiga DSQning Markazlashgan axborot bazasida joylashgan ma'lumotlardan foydalanish huquqi beriladi.
Pensiya jamg'armasining elektron so'rovi kelib tushganda, DSQning Markazlashgan axborot bazasi yakka tartibdagi hisobga olishning tegishli ma'lumotlarini shakllantiradi va yuboradi.
Shuningdek qarorda jismoniy shaxs, ish beruvchi va davlat soliq xizmati organlarining huquq va majburiyatlari ham ko'rsatib o'tilgan. Qarorning to'liq matni bilan “O'zbekiston Respublikasi qonunchiligi” axborot-qidiruv tizimida tanishish mumkin.
O'zbekistondagi boshqa moliyaviy yangiliklarni www.UzReport.uz da o'qing.
UzReport
