“O‘zmilliybank” AJ xalqaro maktabning ishonchli hamkori
Har qanday tadbirkorning muvaffaqiyati eng avvalo yaxshi hamkor, moliyaviy ko‘makdosh va ishonchli sherikka ko‘p jihatdan bog‘liq. Vaqt bilan sinalgan hamkorning qo‘llab-quvvatlovi sabab tadbirkor o‘z g‘oyasi, yangi loyihasini amalga oshiradi. Shu orqali daromad oladi, yangi ish o‘rni yaratadi, aholining iste'mol mahsulotlariga bo‘lgan talabini qondiradi va davlat g‘aznasiga ham hissa qo‘shadi.
Xususan, nodavlat ta'lim muassasalari muvaffaqiyatida ham bu jihatlar yaqqol ko‘zga tashlanmoqda. Bolajonlarni kichik yoshdanoq xorijiy tillarni o‘rganishlariga imkon beruvchi, ularga zamon talabalari darajasida eng so‘ngi texnologiyalar asosida ta'lim-tarbiya berib kelayotgan “Target” xalqaro maktabi ham ishonchli sherik sifatida “O‘zmilliybank” AJni tanladi.
– O‘zbekistonda ish boshlamasdan avval Amerikada yashab, o‘sha yerda faoliyat yuritar edim, – deydi “Target” xalqaro maktabi asoschisi Behzod Jalilov. – Mamlakatimiz rahbarining tadbirkorlarga qaratgan e'tibori va qo‘llab-quvvatlayotganini ko‘rib menda ham vatanimda biznes qilish istagi paydo bo‘ldi. Toshkentda xalqaro “Target” maktabiga asos soldim va hududlarda uning filiallarini tashkil etdim. Albatta, bu loyihalar katta moliyaviy manba asosida amalga oshadi. Shuning uchun ish boshidanoq banklarning ko‘magidan foydalandik. Xususan, Yunusoboddagi 6-filialimizni ishga tushirishda doimiy hamkorimiz “O‘zmilliybank” AJ bizni qo‘llab-quvvatladi. Bugun davlat maktablarida ham IT va xorijiy tillar kursini tashkil etganmiz.
2021 yilda asos solingan “Target” xalqaro maktabining poytaxtimiz bo‘ylab 5 ta filiali mavjud. Yaqinda o‘z faoliyatini boshlagan Yunusobod filiali 500 o‘ringa mo‘ljallangan. Bu yerda ayni paytda 205 nafar o‘quvchi tahsil oladi. Maktab biznes va IT sohalariga ixtisoslashgan, ingliz tili va matematika chuqurlashtirilib o‘tiladi. Maktab filialida olti oy davomida qurilish-ta'mirlash ishlari olib borildi. Loyihaning umumiy qiymati 500 ming AQSh dollarini tashkil etdi.
– Menda tanlov imkoniyati bo‘ldi, – deydi Barno Qodirova. – Institutda yoki mazkur xususiy maktabda ishlashim mumkin degan. Ingliz tili o‘qituvchisi sifatida shaxsiy rivojlanishim uchun men ushbu maktabni tanladim. Yana bir muhim jihati shundaki, farzandi xususiy maktablarda tahsil oluvchi ota-onalar uchun eng katta qulaylik.
– Joriy yildan boshlab bankning asosiy hisob-raqamlariga ega bo‘lgan hamda o‘zaro shartnoma tuzgan ta'lim tashkilotlariga maxsus Education ta'lim krediti ajratila boshlandi, – deydi “O‘zmilliybank” AJ boshqarma boshlig‘i Abdurahim G‘ofurov. – Ushbu kredit mahsulotining muddati 36 oy, qiymati 50 million so‘mni tashkil etadi.
“Target” xalqaro maktabi asoschisining ta'kidlashicha, xalqaro maktab “O‘zmilliybank” AJ bilan kelgusida ham hamkorlikni yanada rivojlantirish niyatida. Eng asosiysi, bu yerda o‘quvchilar nafaqat bilim, shuningdek, liderlik salohiyatini ham kamol toptiradi.
https://uza.uz/uz/posts/ozmilliybank-aj-xalqaro-maktabning-ishonchli-hamkori_641699
