"O‘zmilliybank" AJ tizimida korrupsiyaga yo‘l qo‘yilmaydi

Korrupsiya har qanday soha taraqqiyotida to‘siq bo‘lib, jamiyatni iqtisodiy, ma’naviy tanazzulga olib keladi. Shuning uchun mamlakatimizda unga qarshi kurashish, davlat organlari faoliyatining ochiqligi va shaffofligini ta’minlashga ustuvor vazifa sifatida qaralmoqda.

“O‘zmilliybank” AJ tizimida ham korrupsiyaga qarshi kurashish yo‘nalishini shakllantirish, shuningdek, bu boradagi ishlar samaradorligini oshirish maqsadida Bank boshqaruvi raisining buyrug‘iga asosan Axborot va bank xavfsizligi departamenti tarkibida Komplayens nazorat va korrupsiyaga qarshi kurashish boshqarmasi tashkil etildi. Ko‘p yillik tajriba hamda malakaga ega bo‘lgan rahbar va xodimlardan iborat boshqarma shaxsiy tarkibi shakllantirildi.  

Bankning korrupsiyaga qarshi kurashish yo‘nalishi bo‘yicha Bosh ofis va filiallar xodimlari malakasini oshirish, xalqaro tajribalar asosida korrupsiyaga qarshi kurashish tizimini joriy etish bo‘yicha xalqaro CERT Akademiyasini jalb qilgan holda “ISO 37001” standarti bo‘yicha bankning 27 nafar xodimiga sertifikatlar olindi. Bundan tashqari, 2023 yil 4 yanvardagi “O‘zmilliybank” AJ xodimlarini 2023 yilda “Korrupsiyaga qarshi kurashish” yo‘nalishi bo‘yicha o‘qitishni tashkil etish to‘g‘risidagi farmoyishi asosida Bosh ofisning kredit, chakana biznes, davlat dasturlari va agrar sektorni moliyalashtirish departamentlari hamda Ipoteka krediti boshqarmasi xodimlari uchun O‘zbekiston Respublikasi Huquqni muhofaza qilish akademiyasining Korrupsiyaga qarshi kurashish ilmiy-ta’lim markazi tomonidan muntazam ravishda seminar mashg‘ulotlari o‘tkazilmoqda.  

O‘z navbatida Bankning barcha viloyat va tuman filiallari hamda bank xizmatlari markazlarida ham “Korrupsiyani oldini olish va unga qarshi kurashish” mavzularida onlayn muloqotlar tashkil etilmoqda. Maqsad bank sohasida korrupsion holatlar oldini olish orqali xizmat ko‘rsatish sifatini oshirish, mijozlar bilan munosabatlarda ish vazifasiga taalluqli bo‘lmagan hodisalar ishtirokchisiga aylanib qolmaslikdan iborat. Zotan, ushbu illat har qanday bankning imidji va mavqeyiga putur yetkazishi mumkin. Shuni alohida ta’kidlash kerakki, “O‘zmilliybank” AJ tizimida korrupsiyaga oid huquqbuzarliklar haqida tezkor xabar berish imkonini beruvchi maxsus aloqa kanallari, rasmiy veb-saytda esa alohida bo‘lim tashkil etilgan. Bankning ijtimoiy tarmoqlardagi sahifalarida tegishli havolalar joylashtirilgan.  

“O‘zmilliybank” AJ xodimlarining korrupsiya illati va uning oqibatlaridan xabardor qilish, huquqiy ongini oshirish maqsadida Bankning bosh ofisi hamda filiallarida aksilkorrupsiya burchaklari tashkil etilib, ularda slaydlar, infografika va boshqa innovatsion ko‘rinishdagi ma’lumotlar joylashtirildi.  

“O‘zmilliybank” AJning bir qator ichki me’yoriy hujjatlari korrupsiyaga qarshi kurashish sohasidagi O‘zbekiston Respublikasi Prezidentining farmon va qarorlari, Vazirlar Mahkamasining qarorlari talablariga moslashtirildi. Shu bilan birga, bank tizimidagi ma’muriy va byurokratik to‘siqlarni bartaraf qilish, bank xizmatlari tezkorligini oshirish va soddalashtirish, masofadan turib xizmat ko‘rsatishni kengaytirish, o‘z-o‘ziga xizmat ko‘rsatish tizimlarini yanada takomillashtirish bo‘yicha tarkibiy tuzilmalar bilan birgalikda tegishli yangi ichki me’yoriy hujjatlar ishlab chiqildi, amaldagilarga qo‘shimcha va o‘zgartirishlar kiritilmoqda.  

 Albatta, amalga oshirilayotgan bu kabi ishlarning ko‘lami keng va uning muntazamligini ta’minlash juda muhim. Ta’kidlash joizki, “O‘zmilliybank” AJ tizimida korrupsion holatlarni bartaraf etishda barcha xodimlar qatnashishlari, ularning taklif va mulohazalarini bildirishlari muhim hisoblanadi. Shu bois har bir bank xodimi zimmasiga o‘z lavozim majburiyatlariga mas’uliyat bilan yondashish, ichki tartib-tamoyillarni buzmasdan, xolisona bajarish vazifa topshirilgan. 

Muxtasar aytganda, O‘zmilliybank amalga oshirilayotgan islohotlarga hamohang tarzda halollik va shaffoflik asosida ishlash, doimiy ravishda yangiliklar bilan hamnafas bo‘lishga alohida e’tibor qaratmoqda.  

https://uza.uz/oz/posts/ozmilliybank-tizimida-korrupsiyaga-yol-qoyilmaydi_517841