Angren-Pop temiryo'l tarmog'ini qurish Loyihasi bo'yicha keng ko'lamdagi ishlar bajarilmoqda
Jahon banki ijrochi direktorlari kengashi O'zbekistonda Angren-Pop temiryo'l tarmog'ini qurish Loyihasi uchun 195 mln. AQSH dollari miqdorida zayom ajratishni ma'qulladi. Loyihaning umumiy qiymati 1 mlrd. 633 mln. 75 ming AQSH dollarini tashkil etadi. Loyihani moliyalashtirish asosan davlat aksiadorlik temiryo'l kompaniyasining shaxsiy mablag'lari, O'zbekiston tiklanish va rivojlanish jamg'armasi va Davlat byudjeti mablag'lari xisobiga amalga oshiriladi.
Bundan tashqari, Xitoyning Eksimbanki ham 350 mln. AQSH dollari miqdorida mablag' ajratmoqda. Ushbu mablag' temiryo'lni elektrlashtirish uchun zarur texnika va uskunalarni sotib olish uchun yo'naltiriladi. Mazkur loyiha Farg'ona vodiysini respublikamizning boshqa hududlari bilan bog'lab transport qatnovini yaxshilashga xizmat qiladi. Yil davomida hududlararo temiryo'l aloqasi 7,6 mln. aholi uchun qulaylik tug'diradi. Kichik va o'rta korxonalar uchun bozorga yo'l ochilib, ular daromadini ortishga imkoniyat paydo bo'ladi. Temiryo'l qurilishi iqtisodiyotning to'qimachilik yoki xizmat ko'rsatish sektori kabi ayrim asosiy tarmoqlarida bandlikning ko'payishiga negiz bo'ladi. Bundan tashqari, ushbu loyiha 6 ta transport koridorida transport va savdoga ko'maklashish Strategiyasi amalga oshirilishini ko'zda tutuvchi Markaziy Osiyo regional iqtisodiy hamkorlik Dasturini (MORIHD) amalga oshirishga ham ko'mak beradi. Pop-Angren temiryo'li Xitoydan Kavkazgacha bo'lgan hududni bog'lovchi 2 koridor yonida joylashgan. Uni ishga tushirilishi transport harajatlarini kamaytirib, o'tkazish layoqati va ishonchligini oshirish imkonini beradi. Ushbu temiryo'l liniyasi ancha tezroq va arzon, hamma mavsumga mos, ishonchli va havfsiz transport xizmati ko'rsatishni ta'minlaydi.
«O'zbekiston temir yullari» Davlat aksionerlik temiryo'l kompaniyasi taxminiga ko'ra, ishga tushirilganining birinchi yilida u orqali 600 mingga yaqin yo'lovchi va 4,6 mln tonna yuk tashiladi. Shu bilan birga, ushbu loyiha yiliga havoga 200 ming tonna zararli gazlar chiqmasligiga olib keladi. Loyiha doirasida Pop va Angren o'rtasida uzunligi 124 kmga teng bir izli temiryo'l, shu jumladan Qamchiq dovoni orqali 19,2 km uzunlikdagi tunnel ham barpo etiladi. Eslatib o'tamiz, O'zbekiston Jahon bankiga 1992 yilda qo'shilgan, mazkur bankning O'zbekiston oldidagi joriy majburiyatlarining umumiy hajmi esa qariyb 1,6 mlrd AQSH dollarini tashkil etadi.
UzReport
