“O‘zmilliybank” AJ xodimlari ish haqlarini “O‘zbekiston mehr-shafqat va salomatlik” fondiga o‘tkazib berdi

Bugun mamlakatimiz va butun dunyoga jiddiy xavf solayotgan koronavirus pandemiyasiga qarshi kurashish borasida kechiktirib bo‘lmaydigan chora-tadbirlar amalga oshirilmoqda.

Infeksiya aniqlangan davlatlar, uni yuqtirgan odamlar soni kun sayin ko‘payib borayotgani eng avvalo, insonlar hayotini saqlab qolish uchun barcha imkoniyatlarni ishga solishni talab etmoqda.

Shu bois, O‘zbekistonda ham xalqimizni bu ofatdan asrash, virus aniqlangan bemorlarni har tomonlama qo‘llab-quvvatlash borasida samarali ishlar amalga oshirilmoqda.

Ayniqsa, O‘zbekiston Respublikasi Prezidentining 2020 yil 19 martdagi “Koronavirus pandemiyasi va global inqiroz holatlarining iqtisodiyot tarmoqlariga salbiy ta'sirini yumshatish bo‘yicha birinchi navbatdagi chora-tadbirlar to‘g‘risida”gi Farmoni murakkab davrda xalqimiz, butun jamiyatimiz uchun ko‘rsatilgan g‘amxo‘rlikning yaqqol ifodasi bo‘ldi.

Zotan, mazkur Farmonga asosan hozirgi sharoitda iqtisodiyot tarmoqlari va sohalarining uzluksiz ishlashini ta'minlash, aholini samarali ijtimoiy qo‘llab-quvvatlash, uning daromadlari keskin pasayib ketishining oldini olish maqsadida 10 trln so‘m mablag‘ning yo‘naltirilgani tarixiy ahamiyatga molikdir.

Aytish joiz, ayni sinovli vaziyatda xalqimizga xos bahamjihatlik va saxovatpeshalik kabi fazilatlar yanada ko‘proq namoyon bo‘lmoqda.

COVID-19 pandemiyasiga qarshi kurashda fuqarolarimizni ruhan qo‘llab-quvvatlash maqsadida tashkil etilgan “O‘zbekiston Mehr-shafqat va salomatlik” jamoat fondiga tushayotgan beminnat mablag‘lar ham buning dalilidir.

Mazkur aksiya doirasida “O‘zmilliybank”AJ xodimlari ham ixtiyoriy ravishda bir kunlik ish haqlarini mazkur fondga beg‘araz o‘tkazib berdilar.

Bu kabi xayrli ishlar esa, sinovli damlarda xalqimizni yanada jipslashtiradi, hamjihatlikni kuchaytiradi. Zero savob ishni har kim har kuni qilishi kerak.