O ‘zbekistonning xalqaro reytingi yuksalmoqda

18.02.2014

O‘zA, 18.02.2014

      Toshkentda biznes yuritish bo‘yicha O‘zbekistonning xalqaro reytingini oshirish (“Doing Business”) masalalariga bag‘ishlangan davra suhbati bo‘lib o‘tdi.
      Tadbir O‘zbekiston Respublikasi Savdo-sanoat palatasi va BMT Taraqqiyot dasturining “Savdoni rivojlantirishga ko‘maklashish” hamda “O‘zbekiston biznes forumi” loyihalari hamkorligida tashkil etildi.
      Davra suhbatida turli vazirlik va idoralar, nodavlat notijorat tashkilotlari, ilmiy-tadqiqot institutlari, xalqaro tashkilotlar, tadbirkorlik subyektlari vakillari ishtirok etdi.
      “Doing Business” biznesni yuritish shartlari bo‘yicha mamlakatimizning xalqaro reytingini yanada oshirishga oid takliflar ishlab chiqish va muhokama qilish tadbirning asosiy maqsadi bo‘ldi. Ushbu reyting Jahon banki tarkibidagi Xalqaro moliya korporatsiyasining tadqiqotlar metodikasiga muvofiq tuziladi.
      O‘zbekiston Respublikasi Savdo-sanoat palatasi raisi A.Shayxov mamlakatimizda ishbilarmonlik muhitini izchillik bilan takomillashtirish Prezidentimiz rahnamoligida amalga oshirilayotgan iqtisodiy siyosatning muhim yo‘nalishlaridan biri ekanini alohida ta’kidladi. Kichik biznes va xususiy tadbirkorlikni rivojlantirish, iqtisodiyotimizga milliy va chet el investitsiyalarini keng jalb etish uchun qulay muhit yaratish bo‘yicha keng ko‘lamli ishlar amalga oshirilmoqda.
      2013-yilda mamlakatimizda 80 dan ortiq ruxsat berish tartib-taomili va litsenziyalanadigan faoliyatning 15 turi bekor qilindi, 65 turdagi statistik hisobot qisqartirildi va 23 turdagi hisobotni taqdim etish muddati o‘zgartirildi. Shuningdek, 22 turdagi interaktiv soliq xizmatlari amaliyotga joriy etildi, zarur ruxsatnomalarni berish muddati ikki barobar va mazkur jarayon to‘lovi besh barobar kamaytirildi.
      Mazkur chora-tadbirlar samarasida Jahon banki va Xalqaro moliya korporatsiyasining “Biznesni yuritish – 2014” (“Doing Business”) reytingidagi mamlakatimizning o‘rni sezilarli darajada oshdi. Mamlakatimizning reytingdagi mavqei biznes va xususiy mulkni ro‘yxatdan o‘tkazish, qurilishga ruxsat olish, kreditlash va xalqaro savdo mezonlari bo‘yicha mustahkamlandi.
Davra suhbati ishtirokchilari tadbirkorlik faoliyatini yuritish shartlarini yanada soddalashtirish masalalarini muhokama qilib, O‘zbekistonning xalqaro reytingiga bag‘ishlangan taqdimotlar va boshqa davlatlarning mazkur sohadagi tajribalari bilan tanishdi.
      – Qonunchiligi bozor ishtirokchilarining o‘zaro munosabatiga ko‘maklashadigan va muhim jamoat manfaatlarini himoya qiladigan davlatlar biznesni yuritish bo‘yicha yuqori reytingga sazovor bo‘ladi, – deydi Xalqaro moliya korporatsiyasining Markaziy Osiyo va Ozarbayjonda moliyaviy infratuzilmalarni mustahkamlash bo‘yicha konsultativ dasturi loyihasi muvofiqlashtiruvchisi A.Nasibov. – Xususiy tadbirkorlikni qo‘llab-quvvatlash va rivojlantirishga qaratilgan qonunchilik hujjatlarining hayotga tatbiq etilishi samarasida O‘zbekistonning “Doing Business” reytingidagi mavqei yuksalib bormoqda.
      Davra suhbati yakunida mamlakatimizning biznesni yuritish bo‘yicha reytingini yanada oshirish yuzasidan takliflar ishlab chiqildi.






So`nggi yangiliklardan xabardor boling

Haftasiga bir martta xabar yuboramiz, va hech qanday spamlarsiz