Foyda solig'i bo'yicha soliq imtiyozlarini qo'llash tartibiga oid Nizom tasdiqlandi
O'zbekiston Respublikasi Moliya vazirligi, Markaziy bank boshqaruvi hamda Davlat soliq qo'mitasi qarori bilan “Tijorat banklari tomonidan kredit portfeli tarkibida uzoq muddatli investitsiyaviy moliyalashning ulushiga qarab yuridik shaxslardan olinadigan foyda solig'i bo'yicha soliq imtiyozlarini qo'llash tartibi to'g'risida”gi Nizom tasdiqlandi.
Ushbu nizomga muvofiq, tijorat banklari tomonidan 2020-yilning 1-yanvariga qadar kredit portfeli tarkibida uzoq muddatli investitsiyaviy moliyalashning ulushiga qarab tabaqalashtirilgan stavkalar bo'yicha yuridik shaxslardan olinadigan foyda solig'i to'lanadi.
Uzoq muddatli investitsiyaviy moliyalash — uch yildan kam bo'lmagan muddatga beriladigan investitsiyaviy kreditlar va lizing xizmatlari, shu jumladan ishlab chiqarish korxonalari negizida tashkil etiladigan kompaniyalar aktivlariga banklar tomonidan yo'naltiriladigan mablag' nazarda tutiladi.
Nizomda imtiyozlarni qo'llash tartibi belgilangan. Unga ko'ra, mustaqil soliq to'lovchi bo'lgan filiallar uzoq muddatli investitsiyaviy moliyalashning ulushini mustaqil ravishda aniqlashadi.
Yuridik shaxslardan olinadigan foyda solig'i stavkasi kredit portfeli tarkibida uzoq muddatli investitsiyaviy moliyalashning ulushiga qarab tabaqalashtiriladi. Jumladan, moliyalash 35 foizdan 40 foizgacha bo'lganda uning stavkasi belgilangan stavkaning 80 foizi, 40 foizdan 50 foizgacha bo'lganda 75 foizi, 50 foizdan yuqori bo'lganda 70 foizini tashkil etadi.
Oldindan uch yildan kam bo'lmagan muddatga berilgan investitsiyaviy kredit yoki lizing bo'yicha xizmatlar muddatidan ilgari so'ndirilgan taqdirda, ushbu Nizom maqsadlari uchun mazkur kredit yoki lizing bo'yicha xizmatlar uzoq muddatli investitsiya sifatida baholanadi.
Yuridik shaxslardan olinadigan foyda solig'ining imtiyozli stavkasi Soliq kodeksining 128-moddasiga asosan yuridik shaxslardan olinadigan foyda solig'i bo'yicha soliq solinadigan bazaga nisbatan qo'llaniladi. Imtiyozlarni qo'llash uchun tijorat banklari davlat soliq xizmati organlariga hisobot yili yakuni bo'yicha yuridik shaxslardan olinadigan foyda solig'i hamda obodonlashtirish va ijtimoiy infratuzilmani rivojlantirish solig'i hisob-kitoblarini taqdim qilish bilan bir vaqtda kredit portfeli tarkibida uzoq muddatli investitsiyaviy moliyalashning ulushi hisob-kitobi bo'yicha ma'lumotnomani taqdim qiladi. Soliq imtiyozlarining to'g'ri qo'llanishi ustidan nazoratni davlat soliq xizmati organlari amalga oshiradi.
Uzreport
